విధుల పట్ల నిర్లక్ష్యం వహిస్తే కఠిన చర్యలు తప్పవు

నాగర్ కర్నూల్, మన ప్రజాపక్షం :బుధవారం సాయంత్రం ఆకస్మికంగా ఆర్డీవో కార్యాలయాన్ని జిల్లా కలెక్టర్ తనిఖీ చేశారు. జిల్లా పరిపాలనలో సమర్థతను పెంపొందించడమే కాకుండా, ప్రభుత్వ సేవలు ప్రజలకు వేగవంతంగా అందేలా చూడాలనే అధికారులను ఆదేశించారు. విధి నిర్వహణలో నిర్లక్ష్యం వహిస్తే సహించేది లేదని నాగర్ కర్నూల్ జిల్లా కలెక్టర్ బాదావత్ సంతోష్ ఉద్యోగులను హెచ్చరించారు. జిల్లా కలెక్టర్ ఉద్యోగుల హాజరు, సమయపాలనపై ఆరా తీశారు. విధి సమయానికి కార్యాలయానికి హాజరుకాని ఉద్యోగుల వివరాలను అడిగి తెలుసుకున్నారు. ప్రభుత్వ ఉద్యోగులు తమ బాధ్యతలను అర్థం చేసుకుని, ప్రజల సేవలో నిబద్ధతతో వ్యవహరించాలని ఆయన సూచించారు. విధి నిర్వహణలో నిర్లక్ష్యం వహించినా లేదా ఆలస్యంగా హాజరైన వారిపై కఠిన చర్యలు తప్పవని స్పష్టంచేశారు. జిల్లా కలెక్టర్ కార్యాలయంలోని అన్ని విభాగాలను సందర్శించి, బయోమెట్రిక్ అటెండెన్స్ విధానం సక్రమంగా అమలవుతోందా లేదా అన్నది పరిశీలించారు. ఉద్యోగులు బయోమెట్రిక్ ద్వారా హాజరు నమోదు చేయడం తప్పనిసరి అని ఆయన గుర్తుచేశారు. పాత పద్ధతిలో నిర్లక్ష్యంగా హాజరు నమోదు చేయడం అనుమతించబోమని హెచ్చరించారు. ప్రభుత్వ సేవలు ప్రజలకు సమయానికి, నిష్పాక్షికంగా అందించడం మనందరి బాధ్యత. ఉద్యోగులు విధి పట్ల కట్టుబడి ఉండాలని, ని ర్లక్ష్యం, ఆలస్యాలు, అనవసర ఆలస్యం, చేస్తే కఠిన చర్యలు తప్పవని హెచ్చరించారు. కలెక్టర్ కార్యాలయ నిర్వహణ, ఫైల్ వ్యవస్థ, రెవెన్యూ రికార్డుల భద్రత, రిజిస్టర్ల నిర్వహణ విధానాన్ని సమీక్షించారు. ప్రజల పిటిషన్లు, దరఖాస్తులు, భూమి సంబంధిత వివాదాలు వంటి అంశాల పరిష్కారానికి సంబంధించిన రికార్డులు సక్రమంగా ఉన్నాయా అని పరిశీలించారు. ప్రజలకు సకాలంలో సేవలు అందించే విధంగా అన్ని రెవెన్యూ విభాగాలు చురుకుగా ఉండాలని సూచించారు. నాగర్ కర్నూల్ రెవెన్యూ డివిజన్ పరిధిలోని ప్రభుత్వ భూముల వివరాల రికార్డులను కూడా పరిశీలించారు. భూ భారతిలో నమోదైన దరఖాస్తుల వివరాలు, భూమి పట్టాదారుల సమాచారాన్ని సమీక్షించారు. భూములపై వివాదాలు లేకుండా, రికార్డులు ఖచ్చితంగా ఉండేలా చూడాలని సంబంధిత అధికారులకు సూచించారు. భూముల రికార్డులు డిజిటల్‌గా అప్డేట్ చేయడంలో ఏమైనా లోపాలు ఉన్నాయా అని తెలుసుకున్నారు. బిజినపల్లి, తాడూరు, తిమ్మాజిపేట, తెలకపల్లి, నాగర్ కర్నూల్ మండలాల పరిధిలో ఉన్న ప్రభుత్వ భూముల వివరాలను కూడా పరిశీలించారు. ఆయా మండలాల్లో భూ సంబంధిత పిటిషన్ల పరిష్కారం వేగవంతం చేయాలని, ప్రజలకు ఇబ్బందులు కలగకుండా చూడాలని కలెక్టర్ ఆదేశించారు.