గంజాయి మత్తులో ఖైదీల వీరంగం

• భయందోళనలో జైలు సిబ్బంది

సంగారెడ్డి, మన ప్రజాపక్షం : సంగారెడ్డి జిల్లా జైలుకు రిమాండ్ ఖైదీలుగా వచ్చిన ఇద్దరు వ్యక్తులు వీరంగం సృష్టించారు. గంజాయికి బానిసలు అయిన ఇద్దరు వ్యక్తులు జైలులో గంజాయి దొరకగా దారుణంగా ప్రవర్తించారు. ఆత్మహత్యాయత్నం చేసి జైలు అధికారులకు ముచ్చెమటలు పట్టించారు. అనంతరం వారిని ఉస్మానియా, ఎర్రగడ్డ, గాంధీ ఆస్పత్రులకు తరలించారు పోలీసులు. వివరాల్లోకి వెళితే.. ఓ హత్యాయత్నం కేసులో ఇటీవల సంగారెడ్డి జైలుకు రిమాండ్ ఖైదీలుగా వచ్చిన ఇద్దరు ఖైదీలు సెప్టెంబర్ 15 న జైలులోని గోడ గడియారం బ్యాటరీ, పెన్ను మూతను మింగేశారు. అనంతరం గాజు పెంకులు మింగి ఆత్మహత్యకు యత్నించామని, కడుపులో నొప్పిగా ఉందని జైలు అధికారులకు చెప్పారు. దీంతో జైలు అధికారులు వారిని హుటాహుటిన సంగారెడ్డిలోని ప్రభుత్వ జనరల్ ఆసుపత్రికి తరలించారు. ఎక్సరే తీసేందుకు వచ్చిన అక్కడి వైద్యులను భూతులు తిడుతూ వైద్యం చేయించుకునేందుకు నిరకరించారు. దీంతో జైలు అధికారులు, పోలీసుల సాయంతో ఆ ఇద్దరు ఖైదీలను హైదరాబాద్ లోని ఉస్మానియా ఆసుపత్రికి తరలించారు. ఉస్మానియాలో మరింత రెచ్చిపోయిన ఆ ఖైదీలు… పోలీసులను, వైద్యులను దుషిస్తూ వైద్యం చేయించుకోకుండా గట్టిగ కేకలు వేస్తూ వార్డులోని ఓ మంచాన్ని కూడా విరగొట్టారు. విరిగిన మంచంలోని ఓ ముక్కతో కిటికీ అద్దాలను ధ్వంసం చేశారు. ఆపై, ఆ గాజు పెంకులతో ఒళ్ళంతా గాట్లు పెట్టుకున్నారు. అంతటితో ఆగకుండా గాజు పెంకులను నోట్లో పెట్టుకుని… ఎవరైనా దగ్గరికొస్తే ఆ ముక్కలను మింగేస్తామంటూ వైద్య సిబ్బంది, పోలీసులను బెదిరించారు. దీంతో ఎంతో కష్టపడి వారికీ ట్రీట్మెంట్ చేయించారు పోలీసులు. కానీ, వైద్యులు ఇంజక్షన్ చేసేటప్పుడు కూడా అటు ఇటు ఊగిపోతు ఎగురుతూ నర్సులపై తిరగబడుతూ నానా రభస చేశారు. దీంతో వీరి మానసిక పరిస్థితి బాగా లేదని ఎర్రగడ్డలోని మానసిక వైద్యశాలకు తరలించాలని ఉస్మానియా వైద్యులు సూచించారు. దీంతో జైలు అధికారులు ఆ ఖైదీలను ఎర్రగడ్డ ఆసుపత్రికి తరలించారు. పరీక్షలు చేసిన అక్కడి వైద్యులు ఖైదీల మానసిక పరిస్థితి బాగానే ఉందని, కావాలనే విపరీతంగా ప్రవర్తిస్తున్నారని నిర్దారించారు. ఎలాగోలా ఎక్సరే తీసి… మందులు ఇవ్వడంతో గడియారం బ్యాటరీ, పెన్ను మూత బయట పడ్డాయి. దీంతో పోలీసులు, జైలు అధికారులు ఊపిరి పీల్చుకున్నారు.