మెడికల్ కాలేజీ ఔట్ సోర్సింగ్ ఉద్యోగులకు వేతనాలు చెల్లించాలి

సూర్యాపేట, మన ప్రజాపక్షం :సూర్యాపేట ప్రభుత్వ జిల్లా వైద్యశాలలో వివిధ విభాగాలలో పని చేస్తున్న ఔట్ సోర్సింగ్ ఉద్యోగులకు ఐదు నెలల నుండి వేతనాలు రాక తీవ్రమైన ఆర్థిక ఇబ్బందులకు గురవుతున్నారని సీఐటీయూ జిల్లా కార్యదర్శి నెమ్మాది వేంకటేశ్వర్లు ఆవేదన వ్యక్తం చేశారు. గురువారం నాడు ప్రభుత్వ జిల్లా వైద్యశాల వద్ద మూడు రోజులుగా దీక్షలు చేస్తున్న ఔట్ సోర్సింగ్ ఉద్యోగుల దీక్షను సందర్శించి సంఘీభావం తెలియజేస్తూ మాట్లాడారు. ఈ సందర్భంగా నెమ్మాది మాట్లాడుతూ ఒకటి కాదు రెండు కాదు ఐదు నెలల పాటు ఔట్ సోర్సింగ్ ఉద్యోగులకు వేతనాలు లేకపోతే ఎలా కుటుంబాలు గడుస్తాయని నెమ్మాది ప్రశ్నించారు. ఇప్పటికే సీఐటీయూ మరియు మెడికల్ అండ్ హెల్త్ అండ్ ఎంప్లాయిస్ యూనియన్ ఆధ్వర్యంలో రాష్ట్ర మెడికల్ అండ్ హెల్త్ కమీషనర్ కు జిల్లా కలెక్టర్ తేజస్ నంద లాల్ పవార్ కు వేతనాలు వెంటనే అందించాలని వినతి పత్రం ఇచ్చిన కానీ నేటికి పరిష్కారం కాలేదన్నారు. ఔట్ సోర్సింగ్ ఉద్యోగులు పేద వర్గాలకు చెందిన వారేనని వేతనాలు నెల నెల అందక పోవడంతో పిల్లల ఫీజులు, ఇంటి అద్దెలు, ఆరోగ్య సమస్యలు, కుటుంబానికి కావాల్సిన నిత్యవసర వస్తువులు కొనుగోలు చేయలేని పరిస్థితి ల్లో ఉన్నారని నెమ్మాది వెంకటేశ్వర్లు తెలిపారు. అర్హతలు ఉన్న ఔట్ సోర్సింగ్ ఏజెన్సీ వెంటనే కాంట్రాక్ట్ ఇవ్వాలని నెమ్మాది డిమాండ్ చేశారు లేకుంటే విధులు బహిష్కరించి నిరవధిక సమ్మెకు దిగవలసిన పరిస్థితి రాకుండా చూడాలని ఆయన అన్నారు. ఈ కార్యక్రమంలో యూనియన్ అద్యక్షుడు చికూరి అశోక్, రమాకాంత్, రమణ, జానకి రాములు, మధు, శ్యామ్, మోహినీ, స్వాతి, భవానీ, నారాయణ తదితరులు పాల్గొన్నారు.