భార్యను కిరాతకంగా కత్తితో పొడిచి చంపిన భర్త

మఖ్తల్, మన ప్రజాపక్షం :భార్యను అతి దారుణంగా కత్తితో గోంతు, చెయ్యి కోసి కడుపులో పొడిచి భార్యను హత్య చేసిన సంఘటన నారాయణపేట జిల్లా మఖ్తల్ మండలం సత్యారం గ్రామంలో చోటుచేసుకుంది. నారాయణపేట జిల్లా మఖ్తల్ మండలం సత్యారం గ్రామానికి చెందిన వినోద (33) అనే మహిళకు దాదాపు 12 సంవత్సరాల క్రితం దూరపు బంధువైన కృష్ణారెడ్డితో వివాహం జరిపించారు. భార్యభర్తల మధ్య గత కొన్ని సంవత్సరాల నుండి మనస్పర్ధలు రావడంతో ఐదు సంవత్సరాల నుండి వినోద తన పుట్టిన ఊరైన సత్యారం గ్రామంలో వ్యవసాయం చేస్తూ తన 8 సంవత్సరాల కుమారుడిని పోషించుకుంటూ జీవనం సాగించేది. భర్త కృష్ణారెడ్డి హైద్రాబాద్ లో జీవనం కొనసాగిస్తూ అప్పుడప్పుడు భార్య వద్దకు వచ్చి వెళ్తుందేవాడు. ఇటీవల మూడు రోజుల క్రితం గ్రామానికి వచ్చి మధ్యాహ్నం కుటుంబ సభ్యులతో కలిసి వినోద తన పొలం దగ్గర మధ్యాహ్నం భోజనం ముగించుకొని ఇంటికి వస్తుండగా కుటుంబ సభ్యులకు మాయమాటలు చెప్పి వారిని ముందుకు పంపించి తన భార్యతో పాటు తాను కలిసి వస్తానని చెప్పి పొలం నుండి తిరిగి వస్తుండగా మార్గ మధ్యలో భార్యపై భర్త కత్తితో విచక్షణ రహితంగా పొడిచి చంపి వేశాడని మృతురాలి బంధువులు తెలిపారు. వినోద మృతితో తల్లి మరియు కుటుంబ సభ్యుల రోదనలు మిన్నంటాయి. వినోద కుటుంబ సభ్యుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నారు మక్తల్ పోలీసులు.

చదవండి: గాంధీజీ కి ఘన నివాళులు