నాగర్ కర్నూల్, మన ప్రజాపక్షం :నాగర్ కర్నూల్ పట్టణంలోని దేశి ఇటిక్యాల లో గల బస్తీ దవాఖాన ను జిల్లా కలెక్టర్ బాదావత్ సంతోష్ ఆకస్మికంగా సందర్శి రోగులకు అందించే వైద్య సేవలను క్షేత్రస్థాయిలో పరిశీలించారు. జిల్లాలోని ప్రజలకు మెరుగైన వైద్యసేవలు అందుతున్నాయా లేదా అన్న విషయాన్ని ప్రత్యక్షంగా తెలుసుకోవడానికి కలెక్టర్ బస్తీ దవాఖానను ఆకస్మికంగా తనిఖీ చేశారు. చికిత్సకు వచ్చిన రోగులతో కలెక్టర్ మాట్లాడి, రోగి వివరాలను అడిగి తెలుసుకున్నారు. బస్తీ దవాఖానలో అందుతున్న సేవలపై కలెక్టర్ ఆరా తీశారు. ఈ సందర్భంగా రక్తపరీక్షల గది, మందులు అందించే గది, ఇన్‌పేషెంట్ వార్డు, బెడ్లు, టాయిలెట్లు, వ్యాక్సినేషన్ విభాగాలను పరిశీలించారు. ఆసుపత్రికి ప్రతిరోజూ ఎంతమంది రోగులు వస్తున్నారో అడిగి తెలుసుకున్నారు. మందుల స్టోర్ రూం లోని స్టాక్ వివరాలను స్వయంగా తనిఖీ చేసి, గడువు తేదీలు ముగిసిన మందులు వాడుకలో లేకుండా జాగ్రత్తలు తీసుకోవాలని సూచించారు. బస్తీ దవాఖాన లోపలి మరియు బయట పరిసరాలను పరిశీలించి మరింత శుభ్రత పాటించాలనీ, సేకరించిన స్క్రాప్‌ను వెంటనే తొలగించాలని మెడికల్ ఆఫీసర్‌ను జిల్లా కలెక్టర్ ఆదేశించారు. ప్రజలకు ప్రభుత్వ వైద్యసేవలు పూర్తి స్థాయిలో అందేలా చర్యలు తీసుకోవాలని కలెక్టర్ సూచించారు. అలాంటి సేవలు అందితేనే ప్రజల్లో ప్రభుత్వ వైద్యంపై నమ్మకం పెరుగుతుందని ఆయన తెలిపారు. ఆసుపత్రికి వచ్చే రోగులకు సీజనల్ వ్యాధులపై అవగాహన కల్పించాలని, వ్యక్తిగత పరిశుభ్రతతో పాటు పరిసరాల పరిశుభ్రతపై వైద్య సిబ్బంది చైతన్యపరచాలని కలెక్టర్ సూచించారు.బస్తీ దవాఖానాల ద్వారా అందించే వైద్య సేవలను ప్రజలు తప్పనిసరిగా వినియోగించుకోవాలని, రోగం వచ్చిన తరువాత దవాఖాన చుట్టూ తిరుగకుండా ముందుగానే జాగ్రత్తలు తీసుకోవడం ద్వారా అనారోగ్య సమస్యలను నివారించవచ్చని జిల్లా కలెక్టర్ స్పష్టం చేశారు. కలెక్టర్ వెంట డిఎంహెచ్ఓ డా. రవి నాయక్ ఇతర వైద్య సిబ్బంది తదితరులు ఉన్నారు.
ప్రజలకు ప్రభుత్వ వైద్య సేవలు పూర్తిస్థాయిలో అందించాలి
