అంబరాన్నంటిన దసరా సంబురం భక్తిశ్రద్ధలతో శమీ పూజ కార్యక్రమం

సూర్యాపేట, మన ప్రజాపక్షం :చెడుపై మంచి సాధించిన విజయానికి గుర్తుగా జరుపుకునే దసరా సంబరాలు శనివారం జిల్లా వ్యాప్తంగా అంబరాన్నంటాయి. పలు ప్రాంతాల్లో ఉండే వారంతా పండుగకు సొంత ఇళ్లకు తరలి రావడంతో గ్రామాలన్నీ కళకళలాడాయి. ఈ సందర్భంగా ఆయుధపూజ, నూతన వాహన పూజలు, చిన్నారుల పటాకుల మోతలు, పిండివంటల గుమగుమలు కుటుంబ సభ్యుల బంధువుల కోలాహాలంతో దసరా శోభ ఉట్టి పడింది. సాయంత్రం వేళ ప్రజలు కొత్త బట్టలు ధరించి వివిధ ఆలయాలను దర్శించుకొని జమ్మి వృక్షానికి పూజలు చేసి ఒకరికి ఒకరు శుభాకాంక్షలు తెలుపుకున్నారు. సూర్యాపేట జిల్లా కేంద్రంలో మాజీ మంత్రి సూర్యాపేట శాసనసభ్యులు గుంటకండ్ల జగదీశ్ రెడ్డి సునీత దంపతులు, తెలంగాణ పర్యాటక డెవలప్మెంట్ కార్పొరేషన్ చైర్మన్ పటేల్ రమేష్ రెడ్డి, మాజీ ఎంపీ బడుగు లింగ యాదవ్, మున్సిపల్ చైర్ పర్సన్ పెరుమాళ్ళ అన్నపూర్ణ తదితరులు దసరా ఉత్సవాలలో పాల్గొన్నారు. సర్వ మతాల ప్రతినిధులు, పార్టీ నాయకులు, అధికారులు, ప్రజలు, శాసనసభ్యులు జగదీశ్ రెడ్డిని క్యాంపు కార్యాలయంలో కలిసి శుభాకాంక్షలు తెలిపారు. వేదపండితుల ఆశీర్వచనాలు అందజేశారు. సర్వ మతాల, ప్రతినిధులతో సహా పంక్తి భోజనం చేశారు. దీంతో జిల్లా అంతట ఆధ్యాత్మిక శోభ సంతరించుకుంది. విజయదశమి సందర్భంగా జిల్లా కేంద్రంలో దసరా సంబరాలు అంబరాన్ని అంటాయి. తెల్లవారుజామును నుండే పలు దేవాలయాల్లో భక్తులు ప్రత్యేక పూజలు నిర్వహించారు. వాడవాడ ఆయుధ పూజలతో పాటు అన్ని దేవాలయాలు భక్తులతో కిక్కిరిసిపోయాయి. జిల్లా కేంద్రంలోని జమ్మిగడ్డలో గల మండల పరిషత్ కార్యాలయంలో శ్రీ సంతోషిమాత దేవాలయం ఆధ్వర్యంలో గత 30 సంవత్సరాలుగా నిర్వహిస్తున్న శమీ పూజకు భక్తులు బారులు తీరారు. ప్రత్యేక క్యూ లైన్ ద్వారా వెళ్లి శమీ పూజలో పాల్గొని జమ్మి చెట్టుతో పాటు స్థానికంగా అన్ని దేవాలయాల వారు ఏర్పాటుచేసిన ఉత్సవిగ్రహా దేవత మూర్తులను దర్శించుకున్నారు. సాంప్రదాయ పద్ధతిలో శమీ మంత్రంతో రూపొందించిన కరపత్రాలపై భక్తులు తమ కోరికలు రాసుకొని జమ్మి చెట్టుకు కట్టారు. దసరా రోజున పాలపిట్ట చూడటం అనాదిగా వస్తున్న ఆచారం కావడంతో అక్కడ ఏర్పాటుచేసిన పాలపిట్ట కేంద్రాల వద్ద జనం బారులు తీరి తిలకించారు. వేద పండితులు భక్తులకు శమీ ఆకు అందజేసి ఆశీర్వదించారు. చిన్నారుల నుంచి పెద్దల వరకు పెద్ద ఎత్తున తరలిరావడంతో జమ్మిగడ్డ ప్రాంతమంతా జన సంద్రమై ఆధ్యాత్మిక శోభ సంతరించుకుంది. ఈ వేడుకకు మాజీ మంత్రి సూర్యాపేట శాసనసభ్యులు గుంటకండ్ల జగదీశ్ రెడ్డి, దంపతులు తెలంగాణ రాష్ట్ర పర్యాటక శాఖ డెవలప్మెంట్ కార్పొరేషన్ చైర్మన్ పటేల్ రమేష్ రెడ్డి, మాజీ కౌన్సిలర్లు, నాయకులు పాల్గొన్నారు. ఈ వేడుకలకు వచ్చిన చిన్నారుల నుంచి పెద్దల వరకు మాజీ మంత్రి జగదీశ్ రెడ్డితో సెల్ఫీలు దిగడం కొరకు బారులు తీరారు. దసరా పండుగను పురస్కరించుకొని గత 31 సంవత్సరాలుగా స్థానిక మండల పరిషత్ కార్యాలయంలో శ్రీ సంతోషిమాత దేవస్థానం ఆధ్వర్యంలో ఏర్పాటు చేస్తున్న కైలాస శంకర్ ల స్టేజి అలంకరణ జమ్మిగడ్డలో భక్తులకు ప్రత్యేక ఆకర్షణగా నిలిచింది. ఈ సందర్భంగా హాజరైన భక్తులు కైలాస శంకరులు స్వామి అమ్మవార్లను 10 వేల మందికి పైగా భక్తులు దర్శించుకొని తీర్థప్రసాదాలు స్వీకరించి తమ భక్తిని చాటుకున్నారు. రాంకో సిమెంట్ కంపెనీ డీలర్ తల్లాడ వెంకటేశ్వర్లు ఆధ్వర్యంలో భక్తులందరికి ఉచిత ప్రసాదాలు పంపిణీ చేశారు. కైలాస శంకర్ స్టేజి అలంకరణ వద్ద పిల్లలు పెద్దలు పెద్ద ఎత్తున ఫోటోలు దిగారు. ఏ లాంటి అవాంఛనియ సంఘటనలు జరగకుండా ప్రత్యేక పోలీసు బందోబస్తు నిర్వహించారు.ఈ కార్యక్రమంలో శ్రీ సంతోషిమాత దేవాలయం అధ్యక్ష కార్యదర్శులు నూక వెంకటేశ గుప్తా, బ్రహ్మాండ్లపల్లి మురళీధర్, కమిటీ సభ్యులు పబ్బా ప్రకాష్ రావు, బెలిదే అశోక్, గోపారపు రాజు, బ్రాహ్మణపల్లి బ్రహ్మయ్య, ఉప్పల రమేష్, నూక రవిశంకర్, శివ ప్రసాద్, దేవాలయం మేనేజర్ బచ్చు పురుషోత్తం తదితరులు పాల్గొన్నారు. దేవి శరన్నవరాత్రి ఉత్సవాల సందర్భంగా శనివారం విజయదశమి రోజున శ్రీ సంతోషిమాత అమ్మవారు శ్రీ రాజరాజేశ్వరి దేవిగా భక్తులకు దర్శనం ఇచ్చింది. ఈ సందర్భంగా దేవాలయ అర్చకులు బట్టారం వంశీకృష్ణ శర్మ అమ్మవారికి ప్రత్యేక పూజలు నిర్వహించారు. చండి హోమం, రుద్ర హోమంతో పాటు భవాని దీక్ష మాల ధారణ స్వాములకు పూజ నిర్వహించారు. బ్రాహ్మణ ముత్తైదువకు సుహాసిని పూజ నిర్వహించి భక్తులకు తీర్థ ప్రసాదాలు అందజేశారు. సాయంత్రం వేళ దేవాలయంలో ఏర్పాటుచేసిన శమీ పూజ కార్యక్రమంలో భక్తులు అధిక సంఖ్యలో పాల్గొన్నారు.