ఈవీఎం గోదాము తనిఖీ, భద్రత ఏర్పాట్లు, సిసి కెమెరాల పనితీరు పరిశీలించిన కలెక్టర్

నాగర్ కర్నూల్, మన ప్రజాపక్షం :గురువారం ఈవీఎంలను భద్రపరిచిన గోదామును విస్తృతంగా తనిఖీ చేశారు. ఎన్నికల ప్రక్రియలో ఈవీఎంల భద్రత అత్యంత ముఖ్యమని పేర్కొన్న ఆయన, గోదాములో అమలు చేస్తున్న భద్రతా ఏర్పాట్లు, సీసీ కెమెరాల పనితీరు, యాక్సెస్ కంట్రోల్ వ్యవస్థలను సమీక్షించారు. కలెక్టర్ సాంకేతిక సిబ్బందితో మాట్లాడి, యంత్రాల నిర్వహణ విధానం, రికార్డు నిర్వహణ, రోజువారీ పర్యవేక్షణ చర్యలపై వివరాలు తెలుసుకున్నారు. ప్రతి నెలా ఈవీఎంలను క్రమం తప్పకుండా తనిఖీ చేయడం, భద్రతా పరికరాలు ఎల్లప్పుడూ సక్రమంగా పనిచేస్తున్నాయా అని నిర్ధారించుకోవడం అత్యవసరమని ఆయన పేర్కొన్నారు. గోదాములో ఎలాంటి లోపాలు లేకుండా పటిష్టమైన భద్రతా వ్యవస్థ ఉండాలని సూచిస్తూ, గోదాములో పనిచేస్తున్న సిబ్బంది ఎప్పటికప్పుడు అప్రమత్తంగా ఉండాలని కలెక్టర్ ఆదేశించారు. అవసరమైతే సీసీ కెమెరా రికార్డులను సమీక్షిస్తూ ఏవైనా సాంకేతిక సమస్యలు తలెత్తితే వెంటనే పరిష్కరించాలని సూచించారు. ఎన్నికల సామగ్రి భద్రతపై ఎలాంటి నిర్లక్ష్యం సహించబోమని స్పష్టం చేసిన కలెక్టర్, గోదాములో అగ్ని ప్రమాద నిరోధక పరికరాలు, విద్యుత్ సదుపాయాలు, రక్షణ గార్డుల విధులు వంటి అంశాలను కూడా పరిశీలించారు. ఎన్నికల ప్రక్రియ పారదర్శకంగా, నిష్పక్షపాతంగా కొనసాగేందుకు భద్రతా చర్యలు అత్యంత కీలకమని ఆయన పేర్కొన్నారు. జిల్లా కలెక్టర్ వెంట ఎన్నికల విభాగం సూపరింటెండెంట్ రవికుమార్, రాజకీయ పార్టీల ప్రతినిధులు ఎండి హుస్సేన్, శివకృష్ణ సిబ్బంది తదితరులు ఉన్నారు.