నాగర్ కర్నూల్, మన ప్రజాపక్షం :నాగర్‌కర్నూల్ జిల్లాలో రానున్న రోజుల భారీ వర్షాలు కురిసే అవకాశం ఉందన్న వాతావరణ విభాగం హెచ్చరికల నేపథ్యంలో అన్ని శాఖలు అప్రమత్తంగా ఉండాలని, నిరంతరం కురుస్తున్న వర్షాల కారణంగా రాబోయే రోజుల్లో భారీ నుండి అతి భారీ వర్షాలు పడే అవకాశం ఉందని జిల్లా కలెక్టర్ బాదావత్ సంతోష్ తెలిపారు. ఈ సందర్భంగా జిల్లా కలెక్టర్ మాట్లాడుతూ జిల్లా పరిధిలో వర్షపాతం కారణంగా ఏర్పడే పరిస్థితులను దృష్టిలో ఉంచుకుని అన్ని అధికారులకూ అప్రమత్తంగా ఉండాలని, ఎలాంటి ప్రమాదాలు కూడా సంభవించకుండా ముందస్తు చర్యలు చేపట్టాలని కలెక్టర్ ఆదేశించారు. అత్యంత జాగ్రత్తగా పర్యవేక్షించవలసిన ప్రాంతాల్లో ట్రాఫిక్ అంతరాయాలు, చెరువులు, ట్యాంకులు, శిథిలమైన ఇళ్ళు వంటి చోట్లని గుర్తిస్తూ, వీటిలో ప్రజలకు ఏవైనా సమస్యలు ఎదురుచేయకుండా అధికారులు మానిటరింగ్ చేయాల్సిందిగా తెలిపారు. నది ప్రవాహ ప్రాంతాల్లో చేపల వేటకు వెళ్లకుండా జాగ్రత్తలు తీసుకోవాలన్నారు. నదులు, చెరువులు ప్రవహించే ప్రాంతాలలో ప్రజల రాకపోకలపై ప్రత్యేక దృష్టి సారించాలని సూచించారు. విద్యుత్ శాఖ అధికారులు ప్రత్యేక శ్రద్ధ తీసుకుని, విద్యుత్ సరఫరాకు ఎలాంటి అంతరాయం లేకుండా చర్యలు చేపట్టాలని అన్నారు. వేలాడుతున్న విద్యుత్ వైర్లను వెంటనే తొలగించి, ప్రాణనష్టం జరగకుండా చూడాలని ఆదేశించారు. అవసరమైన పక్షంలో, లోతట్టు ప్రాంతాల్లో నివసించే ప్రజలను ముందుగానే సురక్షిత ప్రాంతాలకు తరలించి, పునరావాస కేంద్రాలను ఏర్పాటు చేయాలని జిల్లా కలెక్టర్ సూచించారు. ఎలాంటి అత్యవసర పరిస్థితులలో కూడా తక్షణమే స్పందించడానికి ప్రధాన కార్యాలయంలో అధికారులు ఎప్పుడూ అందుబాటులో ఉండాల్సిన అవసరం ఉన్నట్లు కలెక్టర్ పేర్కొన్నారు. జిల్లా అధికారులందరూ సమన్వయంతో ప్రజల రక్షణ కోసం అన్ని విభాగాల అధికారులు అప్రమత్తంగా ఉండాలని, సమన్వయంతో పని చేస్తూ, ముందస్తు చర్యలు తీసుకోవాలని జిల్లా కలెక్టర్ ఆదేశించారు.
వర్షాల నేపథ్యంలో అధికారులు అప్రమత్తంగా ఉండాలి
