చాకలి ఐలమ్మ గ్రహాన్ని ప్రారంభించిన మంత్రి ఉత్తమ్ కుమార్ రెడ్డి

హుజుర్నగర్, మన ప్రజాపక్షం :తెలంగాణ ప్రభుత్వం సామాజిక న్యాయానికి కట్టుబడి బీసీలకు విద్య, ఉద్యోగాలు, స్థానిక సంస్థలలో 42% రిజర్వేషన్ కల్పించామని రాష్ట్ర నీటిపారుదల,పౌర సరఫరాల శాఖ మంత్రి నలమాద ఉత్తమ్ కుమార్ రెడ్డి అన్నారు. శుక్రవారం హుజూర్నగర్ మండలం బూరుగడ్డ గ్రామంలో చాకలి ఐలమ్మ 135 వ జయంతి సందర్భంగా గూడెపు శ్రీను ఆధ్వర్యంలో ఏర్పాటుచేసిన చాకలి ఐలమ్మ విగ్రహాన్ని మంత్రి ప్రారంభించారు. ఈ సందర్భంగా ఏర్పాటు చేసిన సభలో ఆయన మాట్లాడుతూ చాకలి ఐలమ్మ జీవిత చరిత్ర చాలా గొప్పదని, నాటి నైజాం ప్రభుత్వంలో భూసంస్కరణల కోసం విరోచిత పోరాటం చేశారని,వారి చరిత్ర విద్యార్థులకు తెలిసేలా కార్యక్రమాలు నిర్వహించాలని సూచించారు. మా ప్రభుత్వం చాకలి ఐలమ్మ కు గుర్తింపుగా కోటి ఉమెన్స్ యూనివర్సిటీకి చాకలి ఐలమ్మ పేరు పెట్టడమే కాకుండా వారి పేరుకు తగ్గట్టుగా వందల కోట్లతో అభివృద్ధి చేసి దేశంలోనే అగ్రగామి యూనివర్సిటీగా నిలిపేందుకు కృషి చేస్తున్నామని మంత్రి అన్నారు. స్వాతంత్రం వచ్చిన తర్వాత దేశ చరిత్రలో మొదటిసారిగా తెలంగాణ ప్రభుత్వం లో తాను చైర్మన్ గా ఉన్నా కమిటీ 3.70 కోట్ల మందిని ఇంటింటి సర్వే నిర్వహించి బిసి కులగణన చేసిందని,రాష్ట్రంలో 50% బీసీలు ఉన్నారని మా ప్రభుత్వం బీసిలకు విద్యలో, ఉద్యోగాలు, స్థానిక సంస్థల్లో 42 శాతం రిజర్వేషన్ కల్పించేందుకు రాష్ట్ర క్యాబినెట్, శాసనసభలో బిల్లును ఆమోదించి చట్టం చేశామని బీసీలకు అన్ని విధాల సహాయం చేసేందుకు మా ప్రభుత్వం చిత్తశుద్ధితో ముందుకెళ్తున్నామని ఈ సందర్భంగా మంత్రి తెలిపారు. బూరుగడ్డ చెరువు తెగినప్పుడు 2.6 కోట్లతో యుద్ధ ప్రతిపాదికన మరమ్మతులు చేపించామని, దేవాలయం అభివృద్ధికి 80 లక్షల రూపాయలు మంజూరు చేసామని గ్రామంలో పలు సిసి రోడ్లు నిర్మించామని తెలిపారు. పేదలకు సరైన విద్యా,వైద్య అవకాశాలు కల్పించేందుకు 7.5 కోట్లతో జూనియర్ కాలేజ్,4.5 కోట్లతో డిగ్రీ కాలేజ్ లకు నూతన భవనాలు, హుజూర్నగర్ పట్టణంలో వంద పడకల ఆసుపత్రి,డయాలసిస్ సెంటర్, సిటీ స్కాన్ సెంటర్ ఏర్పాటు చేశామని పేదలకు సొంత ఇల్లు ఉండాలని రామస్వామి గుట్ట వద్ద 2120 సింగిల్ బెడ్ రూమ్ ఇల్లులు నిర్మించామని,అలాగే యువతకు ఉద్యోగాలు కల్పించేందుకు 6 కోట్లతో ఐటిఐ కాలేజ్,40 కోట్లతో అడ్వాన్స్ టెక్నాలజీ సెంటర్లను మంజూరు చేశామని ఈ సందర్భంగా మంత్రి తెలిపారు. తాను గెలిచిన ప్రతిసారి విద్యా, వైద్యం, సాగునీరు, తాగునీరు లాంటి మౌలిక వసతులు ఏర్పాటుచేసి ప్రజల జీవన ప్రమాణాలు పెరిగేలా కృషి చేస్తున్నాని తెలిపారు. అంతకుముందు హుజూర్నగర్ పట్టణం గోవిందాపురం లో 2.0 కోట్ల రూపాయలతో నిర్మంచిన బ్రిడ్జి ని మంత్రి నలమాద ఉత్తమ్ కుమార్ రెడ్డి ప్రారంభించారు. ఈ సందర్బంగా ఆయన మాట్లాడుతూ హుజూర్నగర్ పట్టణ వాసులు కు వర్షాలు కురిసినప్పుడు చాలా ఇబ్బంది పడుతున్నారని పట్టణ వాసులకు మేలు జరిగేలా 2 కోట్ల రూపాయలతో బ్రిడ్జి మంజూరు చేసి నేడు ప్రారంభించటం చాలా సంతోషంగా ఉందని ప్రజలకు అన్ని మౌలిక వసతులు కల్పించేందుకు హుజూర్నగర్ పట్టణాన్ని అభివృద్ధి పథంలో నడిపేందుకు నా వంతు కృషి చేస్తానని ఈ సందర్భంగా మంత్రి తెలిపారు. ఈ కార్యక్రమంలో ఆర్డీవో శ్రీనివాసులు, మార్కెట్ కమిటీ చైర్మన్ లు రాధికా అరుణ కుమార్, బెల్లంకొండ విజయలక్ష్మి నరసింహారావు, మున్సిపల్ కమిషనర్ శ్రీనివాస్ రెడ్డి, గ్రామ పెద్దలు, అధికారులు, సిబ్బంది, తదితరులు పాల్గొన్నారు.