కోదాడ, మన ప్రజాపక్షం : సూర్యాపేట జిల్లా కోదాడ పట్టణం జిల్లా పరిషత్ బాలుర ఉన్నత పాఠశాలలో 25 లక్షల డిఎంఎఫ్టి నిధులతో కోదాడ ఎమ్మెల్యే నలమాద ఉత్తమ్ పద్మావతి రెడ్డి తో కలిసి జిల్లా కలెక్టర్ తేజాస్ నందలాల్ పవార్ కంప్యూటర్ ల్యాబ్ ను సోమవారం ప్రారంభించారు. ఈ సందర్బంగా కలెక్టర్ మాట్లాడుతూ పాఠ్యాంశాల బోధనలో ఏఐ(ఆర్టిఫిషియల్ ఇంటిలిజెన్స్) విద్య అనుసంధానం చేయాలని నేటి పరిస్థితులకు అనుగుణంగా విద్యార్థులకు సాంకేతికత డిజిటల్ ఎడ్యుకేషన్ అవసరమని తెలిపారు. సాంకేతికత నైపుణ్యమైన విద్య కోసం పాఠశాలలో ఏర్పాటు చేసిన కంప్యూటర్ ల్యాబ్ ను సద్వినియోగం చేసుకొని ఉన్నత స్థితికి ఎదగాలని కోరారు. ప్రతి విద్యార్థికి కంప్యూటర్ బేసిక్ లెర్నింగ్ కోసం మాస్టర్ ట్రైనీ స్ ద్వారా హ్యాండ్ బుక్ ను అందించనున్నట్లు తెలిపారు. ఎమ్మెల్యే ఉత్తమ్ పద్మావతి రెడ్డి మాట్లాడుతూ కోదాడ నియోజకవర్గంలో పైలెట్ ప్రాజెక్టుగా రెండు పాఠశాలల నందు 20 కంప్యూటర్ లు, ఒక ఆడియో విజువల్ స్క్రీన్ ల్యాబ్ ఏర్పాటు చేయడం జరిగినదని, ఇది విజయవంతం అయితే కోదాడ నియోజకవర్గం లోని అన్ని పాఠశాలలో కంప్యూటర్ లాబ్స్ ఏర్పాటు చేయడం జరుగుతుందని, ఈ కంప్యూటర్ ల్యాబ్ ల ద్వారా విద్యార్థులు కంప్యూటర్ నాలెడ్జి పెంపొందించుకొని, ఇంటర్నెట్ ద్వారా సబ్జెక్టులు నేర్చుకుంటారని, నైపుణ్యమైన విద్యను అందించడానికి ప్రభుత్వం కృషి చేస్తుందన్నారు. పాఠశాలలో సాంకేతికత విద్యాభివృద్ధికి జిల్లా కలెక్టర్, స్థానిక ఎమ్మెల్యే ఉత్తమ్ పద్మావతి చేస్తున్న కృషికి కోదాడ మండల విద్యాధికారి ఎండి. సలీం షరీఫ్ కృతజ్ఞతాభివందనాలు తెలిపారు. ఈ కార్యక్రమంలో ఆర్డిఓ సూర్యనారాయణ, ఎమ్మార్వో వాజిద్అలీ, కోదాడ మున్సిపల్ కమిషనర్ రమాదేవి, జిల్లా గ్రంథాలయ చైర్మన్ వంగవీటి రామారావు, పాఠశాల ఇన్చార్జి ప్రధానోపాధ్యాయులు డి.మార్కండేయ, ఉపాధ్యాయులు విద్యార్థులు పాల్గొన్నారు.
